ꃅꋆꄮꇬꉂꏣ
ꐙꈌꐎꑳ
ꃰꐛꈭꐨꃅꑄꃅꆜꈨꑭꐼꇉꀕꇫꎍ,ꉢꑓꁴꑓꇬꇉꄉꉈꑴ꒔ꃢꇁꌊꀉꂿꋧꃅꐞꁧꄮꇬꄈꅉꀊꋨꈚꇬꑟ。
ꎺꇊꐝꍠꀕꇬꎷ,ꀊꄶꋚꅒꋙꋠꀿꇁ꒜ꐮꏭꄮꇬ,ꑋꈌꂷꉐꐛꄷꆏ,ꀉꂿꉢꁳꉈꏭꄉꂷꉐꊭꆹꇬꎷꑟꃅ。ꋌꄹꇬꑋꈌꂷꉐꊭꑲꆏꇭꀨꒆꐳꇈꀑꁮꅺꐳꌧꇐꐋꄩꎆꑴꄷ。ꄚꑠꉬꑴꇬ,ꃦꈜꒈꊭꈭꐨꆏ,ꉢꋌꈻꌊꇁꇈꉠꏯ“ꊾꇰ”ꄹꀒꊨꑟꇬꎷ。ꀊꋨꄮꀊꋨꇅꇈꉈꆏ,ꇖꄮꐰꌠꇬꑋꈌꄮꐰꊬꌠꀊꅰꃅꉢꋋꉂꆘꅝ。ꑋꈌꄮꐰꉢꋋꉂ,ꀊꄶꑋꈌꄮꐰꈯꌩꈯꇓꐴꅑꐴꅿꃴꍚꃴꆧꁏ,ꊨꊭ꒿ꁊꌩꀑꑌꄉꑵꃚꌒꌠꉢꋋꉂ;ꑋꈌꄮꐰꉢꋋꉂ,ꀊꄶꑋꈌꄮꐰꌧꃰꃨꎔꃨ,ꌧꅗꇬꈽꃨ,ꅿꉗꌒꌠꆲꁏꆳꐊꆀꇁꉷꃅꏣ,ꃄꇖꄹꊂꃰꌠꉢꋋꉂ;ꑋꈌꄮꐰꉢꋋꉂ,ꀊꄶꑋꈌꄮꐰꑿꆫꀊꐔꑌꆫꑿꆫꐙꃰꐚꆗꁧꇂꇉꄩꏮ,ꁧꇂꇉꄩꑌꑿꂾꃚꎒꁨꀕ,ꑿꐎꄂꐎꃰ,ꑌꑿꄄꆈꐛꌠꉢꋋꉂ;ꑋꈌꄮꐰꉢꋋꉂ,ꀊꄶꑋꈌꄮꐰꆿꍯꌌꁈꊨꍣꆼꁠꈢ,ꁍꇁꑗꊂꉆꌠꉢꋋꉂ。ꀃꑍꋋꄮꆏ,ꉡꆹꈍꃅꄉꀱꇊꀊꄶꋚꅒꋙꋠꀿꇁ꒜ꐮꏭꄮꐛꏾꎻꈁꇆ,ꈍꃅꄉꑋꈌꂷꉐꊭꈭꐨꀉꂿꁳ“ꊾꇰ”ꄹꏈꏾꎻꈁꇆ!
ꀉꂿꇆ,ꆏꎺꀕꀋꐚ?ꀊꄶꎷꊂꌕꆪꑍꆏꆫꃅꂾꏿꃛ,ꈊꄮꎭꁮꎭꃹꃛ,ꃢꅋꈚꑣꃛꄮꇬ,ꇇꆷꄷꆏ꒔ꃢꋑꀋꋒꅽꐥꐨꐥꄸꊽꉌꐡꈧꌠꆏꌌꁮꅉꃅꄉꌧꉡꇰꇬꎷ,ꉠꉌ꒜ꈍꃅꊷꆣꀕꎻꈁꇆ。ꉡꆹꈍꑋꃢꃅꅽꁮꅉꎔꀕꐊꄉꀀꃅꃹ,꒔ꈓꇈ꒔ꈓ,꒔ꉔꇈ꒔ꉔ。ꉈꑴꈍꑋꃢꀄꂼꂻꐛꐎꄉꀀꐚꇀꄮꇬ,ꂷꇭꁨꑭꏹꌬꏷꌬꂿꐚꂿꀋꐚ,ꀉꂿꆎꆹꄡꇗꃢꅋꈚꑣꂱꒀꂷꇭꇂꃴꇇꃆꇇ꒧ꃅꀋꌐ,ꄡꇗ꒔ꈓꇈ꒔ꈓ,꒔ꉔꇈ꒔ꉔ。
ꍴꊂꌕꆪꆏ,ꈯꌩꈯꇓꂷꅑꌠꂶꈯ,ꀉꂿꆎꆹꈾꒇꈾꋩꋙꎴꒈꏢꃙꄉꑬꆏꇁꀋꉆꑴꇬ,ꄡꇗꉠꏯꉌꇬꑓꇬꇱꀋꏦ。ꄚꉡꆹꈍꃅꑌꂘꑳꇂꃴꑌꄉꎔꎗꃅꂘꅇꀋꅲꃅ,ꌶꅉꈐꏭꄉꉢꆶꉌꉪꅉꇬꀒꏹꑟꇬꎷ。ꈎꇁꆪꈤꎺꇊꐝꄧꀕꑴꌦ,ꀊꄶꃅꃴꉐꂷꉐꌦꍣꀕꉵꑠꑍ,ꄯꒉꉢꍞꇫꄉꇈꐣꁙꉢꑣꇧꎭꄉꉢꆶꉌꉪꅉꇬꀒꏹꑟ,ꉌꊭꌺꋊꌊꐺꈧꌠꈹꅸꐺꇬꈍꃅꈩꌒꎻꈁꇆ,ꁬꏪꆰꏪꂇ,ꌩꈫꌩꏪꀺ,ꈩꌒꀜꌒꌊꇯꍝꃅꀉꂿꁨꌠꀋꎺ。ꂿꃅꈊꅉꇀꅉꑟꀐꂼ,ꑭꅑꑭꐕ꒜ꄳꈐꏭꊐ,ꀉꂿꑊꑍꆈꏸꅍꂷꏦꇇꁉꊭ,ꇤꆹꏢꆹꉠꇭꀧꌕꄿꄚꄉꇙ,ꉌꂵꌦꅪꄚꈿꈘ,ꇬꇉꑓꁴꄚꐊꅐ,꒔ꈭꐨꆏꃬꊭꏬꌌꌠꌟꃅꉡꆹꀉꂿꇱꉅꌊꀈꎓꂘ꒜ꏤꉜꄉꁧꀐ。ꂿꃅꈊꅉꇀꅉꃅ,ꃅꃴꉐꂷꄡꇗꉐꌦꍣꀕꉵꇬꎷ,ꀊꄶꁧꐚꈝ꒜ꈜꈪꈛꌎꃬꃶꇴꄂꌟꃅꄂꏡꌠꈍꃅꃄꉔꈛꏻꎻꈁꇆ,ꀉꂿꉉꆹꉇꆹꑬꎪꈜꐯꊐ,ꇇꎪꈜꉐꅞ,ꉢꋌꎼꃨꆰꏸꈧꐤꅉꃨꆰꅉꑟꇬꎷ。ꀊꋨꄹꉖꈍꃅꄉꀈꎓꂘ꒜ꏤꑟꁧꌠꉢꇫꅉꀋꐚ,ꈍꃅꄉꀱꉪꏤꀁꇬꑟꇁꌠꑌꉢꇫꅉꀋꐚ,ꀊꋨꄹꉖꆺꑳ꒰ꃴꉐꌦꆈꑰꀕꈭꐨꐻ꓂ꇤꊪꀕꈧꌠꀉꄂꈍꃅꑌꎺꇊꐝꄧꀕꇬꎷ,ꈍꃅꑌꉪꇊꑓꁴꅐꇬꎷ。꒔ꊂꈭꐨꆏ,ꉡꆹꌶꅉꈐꏭꄉꆶꉌꉪꅉꇬꏹꀋꀬꃅꉌꊢꑓꊢꌧꇐꁱꂷꌷ,ꌧꇐꁱꂷ꒔ꑍ꒔꒿ꃅꀻꎆꆹꀐ。
ꃅꈎꃅꆪꏭꅐꏮꈴꏽ,ꃅꑍꃅꉖꑍꅐꌊꈴꏿ,ꀋꋓꀋꉪꃅꇬꆏꋅꊂꌕꆪꃅꃴꃯꐛꃅꈋꐼꇉꀕꇀꌦꀐ。ꀊꋨꄹꈎꆏ,ꀉꂿꋧꃅꐞꁧꀐ,ꀻꑳꅱꐡꍇꌠꋌꇤꇫꎭꇈꋧꃅꐞꁧꀐ。ꀉꂿꇆꀉꂿ,ꌷꎹꌷꈹꈭꐨꌶꅐꄉꌤꃅ,ꑓꂭꋏꀋꂪ,ꑓꊭꇸꀋꂪꑴꇬ,ꆎꆹꉠꎁꃅꄯꒉꌶꁌꎹꅷꇈꈬꇉꃪꏮ,ꏦꏪꇓꂃꆏꋒꅗ,ꌩꑱꂷꑱꆏꉀꅗ;ꆎꆹꉠꎁꃅꄯꒉꌶꁌꉛꅷꁡꇙꁡꇤꋖ,ꃷꇎꈌꑝꋻ,ꃷꇤꃬꋖꋺ。ꑠꉬꑴꇬ,ꑆꊋꀱꀋꂪ,ꉌꌒꄀꀋꂪ,ꆎꆹꋧꃅꐞꁧꀐ,ꋧꃅꐞꁧꄉꃅꇴꉒꐎꄓ,ꉒꐎ꒔ꌅꐛꃅꑆꃴꇉꇈꅉꉜꄉꐚꏷꏿꁧꃲ,ꅽꃅꇏꂶꄟꈧꌠꀉꄂꉢꁳꎺꇁꈧꊰꀕꇬꎷ,ꅽꎭꐪꌒꐨꈧꌠꀉꄂꉢꁳꉪꇊꑓꁴꅐꇬꎷ。
ꉢꅉꀕꃅꀄꂼꂻꐛꄉꂻꇬꎷ,ꀉꂿꑊꑍꒊꆭꀕꃅꋚꃅꒉꑽꇤꈫꇤꇋꏮꌠꂻ,ꃮꉘꃬꏿꐷꈭꐷꇜꐺꌠꂻ,ꎆꉛꋙꉛꁡꇙꁡꇤꋖꌠꂻ,꒧ꁨꊖꑣꁍꑗꈬꊂꉆꌠꂻ,ꌩꏓꒉꇸꇈꈬꇉꃪꐺꌠꂻ。ꄚꑠꉬꑴꇬ,ꀄꂼꅉꐚ꒔ꂷꐥꀋꇮꅊꇈ,ꉢꈍꑋꃢꃅꑓꅑꑓꏮꇤꈫꇤꇋꉜ,ꇤꈫꇤꇋꀉꂿꊌꀋꂿ;ꈍꑋꃢꃅꑓꅑꑓꏮꐷꈭꐷꇜꉜ,ꐷꈭꐷꇜꀉꂿꊌꀋꂿ;ꈍꑋꃢꃅꑓꅑꑓꏮꁡꇙꁡꇤꉜ,ꁡꇙꁡꇤꀉꂿꊌꀋꂿ;ꈍꑋꃢꃅꑓꅑꑓꏮꁍꑗꈬꊂꉜ,ꁍꑗꈬꊂꀉꂿꊌꀋꂿ;ꈍꑋꃢꃅꑓꅑꑓꏮꇈꈬꇉꃪꉜ,ꇈꈬꇉꃪꄡꇗꀉꂿꊌꀋꂿ。
ꀉꂿꇆꀉꂿ,ꀉꂿꉂꏣꎴ,ꉂꏣꈜꀕꎴ,ꀉꂿꉂꑟꅶ,ꉂꑟꈜꀕꅶ,ꉠꑠꀕꂷꀿꉂ꒜ꉂꈭꏝꇖꄮꐰ,ꉁꆏ꒿ꀕꐚꀐꂼ。
ꀒ,ꀉꂿ,ꀉꂿꇆꀉꂿ。
ꁱꊿꀑꐱꃆꂮ:ꐙꈌꐎꑳ,ꆺꃅꏪꐦꊾꒆꌺ,ꍏꇩꀁꑌꊿꋅꁱꃀꑪꉼꀕꑼ,ꂴꊁꃅꁱꇐꀉꑌꈨꁱꌊ《ꊿꋅ》、《ꀊꉘꌠꏀꁱ꒜》、《ꆃꎭꉜꇐꁱꀕ》ꋋꈨꇬꄀꋺ,ꁱꌊ“ꆀ꒿ꊅ”、“ꌧꍧꆀ꒿ꅇꁊ”、“ꍏꇩꆀ꒿”ꋋꈨꇬꑌꄀꋺ。ꁱꇐꄹꁆꆏꌋꌊ《ꍏꇩꆈꌠꀋꃅꋋꄮꆀ꒿ꀕꇐꉻꏑꄉꌠ》、《ꃅꋊꃨꀕꅿꉗꄙꈎꌒ》、《ꆀꃅꂙꃨꃨꈍꀕ》ꄷꁱꇐꌋꏑꄉꋋꈨꇬꇱꄉ。